Akademia për gjykatës dhe prokurorë publikë më 4 prill 2026 organizoi një trajnim me temë: “Analiza e mjeteve provuese në procedurën penale, deklaratat e dëshmitarëve, të dëmtuarve dhe ekspertëve, si dhe ekspertizat e kundërshtuara”, i cili ishte i dedikuar për gjykatës nga departamentet penale dhe prokurorë publikë nga të gjitha zonat e apelit.
Trajnimi u zhvillua nga Zoran Dimitrievski, gjykatës në Gjykatën Supreme të Republikës së Maqedonisë së Veriut, dhe Anita Pop Metodieva, prokurore publike në Prokurorinë e Lartë Publike në Shtip.
Qëllimi i trajnimit ishte forcimi i kapaciteteve profesionale të pjesëmarrësve për marrjen e vendimeve të argumentuara, të ligjshme dhe të drejta, përmes avancimit të njohurive dhe aftësive të tyre për analizimin dhe vlerësimin e mjeteve provuese në procedurën penale.
Në kuadër të trajnimit, vëmendje e veçantë iu kushtua zbatimit të parimit të ligjshmërisë gjatë mbledhjes dhe përdorimit të provave, si dhe relevancës dhe besueshmërisë së tyre. U trajtuan çështje që lidhen me vlerësimin e deklaratave të dëshmitarëve, personave të dëmtuar dhe ekspertëve, si dhe metodologjia e veprimit në rastet e ekspertizave të kundërshtuara. Përmes shembujve nga praktika gjyqësore, pjesëmarrësit patën mundësinë të thellojnë njohuritë e tyre dhe të shkëmbejnë përvoja nga puna e përditshme profesionale, duke forcuar më tej edhe dimensionin njerëzor të drejtësisë si një vlerë që ndërtohet përmes profesionalizmit, integritetit dhe përgjegjësisë.
Me realizimin e këtij trajnimi, Akademia për gjykatës dhe prokurorë publikë e konfirmoi përcaktimin e saj strategjik për forcimin e vazhdueshëm të kapaciteteve profesionale të kuadrove të drejtësisë, përmes një edukimi sistematik dhe të orientuar praktikisht.