Në kuadër të aktiviteteve të saj të planifikuara, të cilat janë pjesë e trajnimit të vazhdueshëm profesional për përsosjen e gjykatësve, Akademia për gjykatës dhe prokurorë publik, sot (21 tetor 2025), organizoi një trajnim me temën Veprimet në lëndët në të cilat një nga palët është një person fizik dhe juridik i huaj (mënyra e dorëzimit të paraqitjeve dhe provave, sigurimi i kaucionit aktuarial). Trajnimi ishte i dedikuar për gjykatësit nga gjykatat civile që përballen me elementë ndërkombëtarë në procedurat gjyqësore. Në fokus të trajnimit ishin aspektet praktike të së drejtës private ndërkombëtare maqedonase, Në përputhje me Ligjin për të Drejtën Ndërkombëtare Private (LDNP) dhe marrëveshjet relevante ndërkombëtare (multilaterale dhe bilaterale). Përmes ligjërimit, punëtorisë dhe analizës së studimeve të rasteve, të pranishmit u njohën me sfidat gjatë punës me subjekte të huaja, si dhe me modalitetet e ndihmës juridike ndërkombëtare në rastet civile dhe tregtare.
Trajnimi u realizua nga: prof. dr. Ilija Rumenov, Fakulteti Juridik Justiniani i Parë dhe Vesna Trajanova, gjykatëse në Gjykatën Themelore Civile Shkup.
Qëllimi i trajnimit ishte të arrinin këto objektiva kyç:
- Përmirësimi i njohurive për trajtimin e personave të huaj: Të mundësohet zhvillimi i shkathtësive për identifikimin dhe zgjidhjen e specifikave në çështjet gjyqësore ku marrin pjesë persona fizikë ose juridikë të huaj, me fokus në respektimin e të drejtës ndërkombëtare private.
- Përvetësimi i mënyrave të dorëzimit të letërporosive: Pjesëmarrësit të njihen me procedurat për dorëzimin ndërkombëtar (përmes organeve qendrore, kanaleve diplomatike ose direkt), duke përfshirë afatet, format dhe pasojat e dorëzimit të pasuksesshëm, sipas Konventave të Hagës, marrëveshjeve dypalëshe dhe rregulloreve kombëtare.
- Kuptimi i sigurimit të kaucionit aktuarial: Të shpjegohet baza ligjore, kushtet dhe procedura për sigurimin e kaucionit aktuarial.
- Promovimi i praktikave gjyqësore efikase dhe uniforme: Të kontribuojë në uljen e gabimeve në procedurat, rritjen e efikasitetit të gjykatës dhe mbrojtjen e të drejtave të të gjitha palëve, në përputhje me parimet dhe rregullat e së drejtës ndërkombëtare private.
- Përputhshmëria me standardet ndërkombëtare dhe evropiane: Të rritet ndërgjegjësimi për implementimin e marrëveshjeve ndërkombëtare dhe njohjen me standardet e rregulloreve të BE-së (Rregullorja e BE-së për marrjen e provave dhe Rregullorja e BE-së për shpërndarje), me qëllim përmirësimin e bashkëpunimit ndërkombëtar dhe qasjen në drejtësi për subjektet e huaja para gjykatave maqedonase.