Габер Дамјановска: Имаме премногу, а не премалку судии и обвинители – резови мора да се направат (Demo)

По долготрајниот процес на тестирање, 97 кандидати беа примени во осмата генерација студенти во Академијата за судии и јавни обвинители. Бројот на кандидати е поголем годинава, но тоа зависи од информациите што се добиваат од судството и обвинителството за одливот на кадри, вели Наташа Габер Дамјановска, директорка на Академијата за судии и јавни обвинители, за Утрински брифинг.

-Годинава имавме 9 кандидати за едно отворено место во Академијата. Обуката тука е гаранција за кариерен напредок во судството и обвинителството. Но, факт е дека во судството има недостиг на кадри. Генерацијата што заврши во 2017 година веќе е на работа. Осмата генерација веќе за две години ќе моат да влезат на работа. Ние треба да обезбедуваме последователност за кадрите во судството, но во последните пет години не беше така оти имаше многу пропаднати конкурси. Сепак, ние треба да направиме проценка колку судии и обвинители ѝ се потребни на земјата оти сметам, според европските просеци, дека имаме премногу судии и обвинители, вели Габер Дамјановска.

Таа додава дека ова веќе се разговара во правосудството и резови мора да се направат иако тоа никогаш не е лесно.

Обуката на Академијата од две години изгледа премногу долга, со оглед на тоа што станува збор на завршени правници. Но, според анализите на ЕУ кај нас постои невоедначеност на правните студии во државата на тие околу дваесет правни факултети.

-Ние даваме максимум да постигнеме нивелација на знаењето. Ангажираме искусни практичари како предавачи и соработуваме со граѓански организации. Ова се генерациите што ќе мораат да го применуваат европското право, а ќе мора да се воведе и медијаторското право, вели Габер Дамјановска за Утрински брифинг.

Нашата таргет група се луѓе кои веќе работат во сферата на правото и да имаат положен правосуден испит, тоа се главно стручни соработници од судовите кои си ја гледаат иднината кариера таму, појаснува Габер Дамјановска.

-Според Уставот, судиите треба да ги избираат судиите, а во Судскиот совет седат судии, вели Габер Дамјановска на коментарот дека во Судскиот совет седат кадри кои се аминувани од партиите.

Проследете го целиот разговор во видеото:https://www.slobodenpecat.mk/video-gaber-damjanovska-imame-premnogu-a-ne-premalku-sudii-i-obviniteli-rezovi-mora-da-se-napravat/