(мкд) Претставници на Центарот за правосудна обука на Кралството Холандија во посета на Академијата за судии и јавни обвинители

Sorry, this entry is only available in Macedonian and Shq. For the sake of viewer convenience, the content is shown below in this site default language. You may click one of the links to switch the site language to another available language.

Денес (16 август 2021 година) претставници на Центарот за правосудна обука на Кралството Холандија, г-а Anne Tahapary, менаџер за обуки и за меѓународни активности и г. Tonnie Hulman, проектен менаџер остварија работна посета на Академијата за судии и јавни обвинители.

Имено, тие ќе престојуваат во Скопје до 20 август 2021 година пришто ќе остварат средби со вработените на Академијата, избрани судии и јавни обвинители од редот на Академијата, посебно оние кои работат на случаи поврзани со слободата на изразување и човековите права, а целта е да се запознаат со правосудниот систем на Република Северна Македонија, работата и организацијата на Академијата, како клучна институција задолжена за продуцирање на нови кадри за судии и јавни обвинители и доедукација на судиите и јавните обвинители во Северна Македонија.

            Првиот работен состанок се одржа со директорот на Академијата, проф. д-р Наташа Габер Дајмановска. Во рамки на состанокот директорот на Академијата накратко ги воведе во правосудниот систем на Северна Македонија, а потоа ја презентираше организациската поставеност на Академијата. Таа исто така, го објасни и начинот на кој функционира Академијата, нејзиниот делокруг, како и начините на кои се реализираат програмите за почетна и континуирана обука. Директорот на Академијата ги информираше претставниците на Центарот за правосудна обука од Кралството Холандија дека Академијата има воспоставено континуирана, повеќегодишна и навистина обемна меѓународна соработка во чии рамки одлично соработува и со Амбасадата на Кралството Холандија. Странските искуства се многу значајни за унапредување на едукативните процеси кои ги спроведува Академијата, а со тоа и за унапредувањето на вештините и знаењата на судиите и јавните обвинители во Северна Македонија, посебно за Правото на ЕУ.

            По средбата со директорот на Академијата, претставниците од Центарот за правосудна обука одржаа работна средба и со заменик директорот на Академијата, Илир Исени, со кого освен за работата на Академијата, нејзината улога во правосудниот систем на Република Северна Македонија и размената на искуства помеѓу Академијата и Центарот за правосудна обука на Кралството Холандија, разговараа и за улогата на претседателите во судовите во Северна Македонија, обуките наменети за претседателите на судовите кои ги организира Академијата, улогата на лицата задолжени за односи со јавност во судовите како и за судско-медиумскиот совет, како тело на Здружението на судиите на Северна Македонија заради подобрување на комуникацијата на судиите и новинарите.

Од одржаните состаноци се очекува да произлезе реализација на идни заеднички едукативни настани кои ќе значат збогатување на содржината на програмите за почетна и контунирана обука.